У Беларусі на траціну вырасьлі даўгі прадпрыемстваў і запаволіўся рост раздробнага таваразвароту

Даўгі прадпрыемстваў

Даўгі прадпрыемстваў (крэдыторская запазычанасьць) на 1 траўня павялічыліся да 111,1 млрд рублёў (83,9 млрд; +32,4%).

Даўгі прадпрыемствам (дэбіторская запазычанасьць) вырасьлі да 93,4 млрд рублёў (год таму — 71,6 млрд; +30,4%).

Прамысловая вытворчасьць

Прамысловая вытворчасьць у студзені — траўні 2025 году ў наяўных цэнах склала 85,3 млрд рублёў — на 1% больш, чым годам раней, сьведчаць дадзеныя Нацыянальнага статыстычнага камітэту.

У горназдабыўной прамысловасьці рост склаў 2,9% (месяцам раней — 2,8%); апрацоўчай — 0,8% (+1,5%). А ў забесьпячэньні электраэнэргіяй, газам, парай, гарачай вадой і кандыцыянаваным паветрам — 1,9% (+0,8%); у галіне водазабесьпячэньня, збору, апрацоўкі і выдаленьня адкідаў зафіксаванае зьніжэньне на 0,2% (+0,1%).

Складзкія запасы

За год складзкія запасы прамысловай прадукцыі вырасьлі амаль на 30%.

У студзені — траўня 2025 году аб’ём складзкіх запасаў прамысловай прадукцыі ў грашовым эквіваленце склаў 11 млрд 552 млн 548 тыс. рублёў — на 28,9% больш, чым за такі ж пэрыяд 2024 году (8 млрд 964 млн 579 тыс.), вынікае з праведзенага «Позiркам» аналізу зьвестак Нацыянальнага статыстычнага камітэту.

Раздробны таваразварот

У Беларусі другі месяц запар фіксуецца запаволеньне росту раздробнага таваразвароту.

У студзені — траўні 2025 году раздробны таваразварот склаў 31 млрд рублёў, што на 9,3% больш, чым было ў аналягічны пэрыяд 2024 году ў супастаўных цэнах.

У студзені 2025-га рост склаў 12,5%, у студзені — лютым — 10%, у студзені — сакавіку — 10,8%, у студзені — красавіку — 10%. З гэтага вынікае, што другі месяц запар назіраецца запаволеньне росту.